Gjykata Supreme e ka aprovuar kërkesën për rishqyrtim të jashtëzakonshëm të Zyrës së Rregullatorit për Energji, (ZRrE), dhe si pasojë ka ndryshuar aktvendimet e Gjykatës së Apelit dhe Themelores.
Në njoftim thuhet se Kolegji i Gjykatës Supreme, e ka refuzuar si të pabazuar kërkesën e Partisë Demokratike të Kosovës, dhe arsyetimet e aktvendimeve të mëhershme ka qenë jobindës dhe jokonkret.
“Kolegji i Gjykatës Supreme e ka ndryshuar aktvendimin e Gjykatës së Apelit dhe aktvendimi i Gjykatës Themelore në Prishtinë, dhe ka refuzuar si të pabazuar kërkesën-propozimin e paditësit Partia Demokratike e Kosovës, për shtyrjen e ekzekutimit të Vendimit të paditurit Zyra e Rregullatorit për Energji”, thuhet në njoftim.
“Nga kjo rezulton se arsyetimi i aktvendimit kontestues të Gjykatës së Apelit nuk përmban arsye ligjore dhe bindëse sipas provave në shkresa të lëndës për kushtet ligjore që kërkohen sipas nenit 22 të LKA për lëshimin e masës së përkohshme, duke mos u bërë i besueshëm dëmi i pariparueshëm që do të justifikonte masën e përkohshme në këtë fazë dhe duke mos paragjykuar përfundimin e procedurës së vendosjes sipas padisë, në mënyrë meritore, lidhur me shqyrtimin e ligjshmërisë së aktit administrativ”, vijon njoftimi.
Në muajin shkurt të këtij viti, ZRRE-ja pati vendosur për shtrenjtim të çmimit të rrymës. Partia Demokratike e Kosovës pati çuar vendimin në Gjykatë. Themelorja pati vendosur për pezullim të përkohshëm të zbatimit të vendimit.
Njëjtë kishte vendosur edhe Gjykata e Apelit, deri në shqyrtimin e plotë të rastit.
Gjykata e Apelit refuzon ankesën e ZRrE-së për shtrenjtimin e rrymës