Një gjykatës amerikan ka urdhëruar hetuesit të lëshojnë një version të redaktuar të dokumenteve gjyqësore që e bindën atë të autorizonte kontrollin e pasurisë së ish-presidentit të ShBA-së, Donald Trump. Ky version i redaktuar është një dokument që përfshin provat e mbledhura nga prokurorët, i cili mund të zbulojë detaje të reja rreth hetimit.
Departamenti i Drejtësisë kishte kundërshtuar lëshimin e një versioni të pacensuruar në mes të hetimeve të tij në vazhdim.
Sipas urdhrit të kërkimit, FBI donte të shihte nëse Trump ka kryer një krim duke i trajtuar në mënyrë të pahijshme të dhënat e qeverisë kur ai i dërgoiu ato nga Shtëpia e Bardhë në Mar-a-Lago pasi administrata e tij mbaroi.
Ky hetim ka filluar sepse presidentëve të ShBA-së u kërkohet të transferojnë dokumente dhe email në ‘Arkivin Kombëtar’ kur të largohen nga detyra. Ish-presidenti amerikan këmbëngul se dosjet e klasifikuara që hetuesit thonë se u gjetën në Florida ishin deklasifikuar tashmë nga ai vetë.
Të enjten, gjykatësi i magjistraturës amerikane Bruce Reinhart urdhëroi që deklarata të lëshohej me redaktime deri në mesditën e të premtes, raporton BBC.
Reinhart tha se prokurorët kishin demonstruar një “arsye bindëse” për të errësuar pjesë të dokumentit, i cili do të zbulonte identitetin e dëshmitarëve, agjentëve të zbatimit të ligjit dhe palëve të pa akuzuara, si dhe “strategjinë, drejtimin, shtrirjen, burimet dhe metodat e hetimit”.