Gazetari Vehbi Kajtazi i ftuar në emisionin “Debat Plus”, ka treguar se si e ka zbuluar padrejtësinë e misioneve në Kosovë. Sipas tij, i njëjti gjykatës, që ka shqiptuar dënimin për rastin e Haradinajt e Gucatit, në të kaluarën i kishte quajtur pjesëtarët e Grupit Drenica kafshë që duhen zbutur.
“Ky kryetari i trupit gjykues, zotëria i cili po tenton t’i frikësojë të tjerët, vetëm se po jua bëj me dije se, ky zotëria në rastin e grupit të Drenicës, gjatë gjykimit ka thënë se këta janë kafshë që duhet të zbuten, dhe për këtë është denoncuar publikisht, edhe askujt nuk i është dëgjuar zëri për këtë punë. Thjesht kanë dalë shkrimet dhe argumentet. Këto që po i them unë, janë në padinë e ish-kryetarit të EULEX, Malcom Simons”, ka thënë Kajtazi.
Tutje, ai ka thënë se padia është shqyrtuar në instanca gjyqësore në Londër dhe Bruksel.
Sipas Kajtazit, si është e mundur që dikush që i quan kafshë që duhen zbutur pjesëtarët e Grupit Drenica, e ka rolin e gjykatësit që shqipton dënimet ndaj tyre, edhe pse kjo mund të jetë e bazuar në ligj.
“Gjithçka mund të jetë e bazuar në ligj, por problemi qëndron se kush po e zbaton atë ligj“, ka thënë Kajtazi.
Sipas gazetarit hulumtues Vehbi Kajtazit, mbi 50 për qind e gjyqtarëve të EULEX-it janë në Gjykatën Speciale.