Grupi për Studime Juridike dhe Politike (GLPS) ka kërkuar nga deputetët që të mos e votojnë në lexim të dytë Projektligjin për Fondin Sovran.
Përmes një komunikate për media, GLPS-ja ka thënë se është thellësisht e shqetësuar me pjesë të caktuara të përmbajtjes së këtij Projektligji dhe mënyrës se si është konceptuar Fondi Sovran në përgjithësi.
“Që të jetë e qartë, GLPS nuk kundërshton idenë e një Fondi Sovran apriori, por kundërshton autorizimet aktuale të Fondit Sovran që të bëj investime në kompanitë private (të brendshme) ku shteti bëhet pjesëmarrës në ekonomi, dhe kështu i vie fundi ekonomisë së tregut. Ne tërheqim këtë paralele në mes të Shtetit dhe Fondit Sovran, sepse kjo e fundit është alter ego e të parës”, thuhet në komunikatë.
Sipas këtij grupi, Fondi Sovran karakterizohet nga një shpërfillje flagrante për themelet e ekonomisë së tregut, kjo e fundit e sanksionuar me Kushtetutën e Republikës së Kosovës.
“GLPS thekson se do të ishte e gabuar të thuhet se tek ne kemi ekonomi të lirë të tregut që lulëzon, dhe se atë po e rrezikon ky Projektligj. Përkundrazi. Por, eksploatimi i kësaj gjendje përmes Fondit Sovran – ndër të tjera – si shoqëri aksionare që investon në kompani të brendshme private dhe komplementohet nga skema e sipërmarrjeve kampionë, është e destinuar të vë vulën e fundit mbi tregun e lirë, edhe ashtu fragjil në Kosovë”, thuhet në komunikatë.
Andaj, GLPS-ja ka apeluar te deputetët e Kuvendit të Kosovës që të mos e votojnë këtë Projektligj, i cili sipas tyre, është e domosdoshme që në disa pjesë të ndryshohet, në mënyrë që të jetë në përputhje me Kushtetutën tonë dhe parimet e tregut të lirë.