Një thirrje në orët e hershme të mëngjesit për të ndërhyrë në Zllakuqan, i ka kushtuar me plagosje policit të Kosovës.
Policia u mor në telefon, pasi u tentua të grabitet shtëpia e priftit në fshatin e Klinës.
E gjitha ngjarja ndodhi rreth orës 4 të mëngjesit e kur policia shkoi në vendngjarje, hasi në rezistencë të grabitësve, ku edhe mbeti i plagosur zyrtari policor.
Rasti që u cilësua si vjedhje-grabitqare, ishte lajmëruar nga vetë prifti i këtij fshati.
“Më të arritur në shtëpinë e priftit, kanë hasur në rezitencë të armatosur dhe më ç’rast të dyshuarit kanë plagosur një zyrtar policor”, ka thënë Fadil Gashi-zëdhënës i Policisë për rajonin e Pejës.
Polici është trajtuar në QKUK, por është jashtë rrezikut për jetë.
“Është trajtuar, ka pasur lëndim me armë zjarri në regjionin e nëngjurit siç i themi ne në regjionin kirural është trajtuar me të gjitha ekzaminimet përkatëse, i është dhënë terapia dhe pacienti është lëshu për trajtim të mëtutjeshëm në shtëpi, nuk ka qenë diçka rrezik që me u trajtu në QKUK”, ka thënë Agron Çitaku-mjek kujdestar në Emergjencë.
Ndërkaq, pjesëtarë të Policisë në kuadër të hetimeve edhe gjatë ditës kanë verifikuar vendin e ngjarjes.