Bedrie Kurtishi, banore e lagjes 29 në Fushë Kosovë, tash e shumë vite jeton në kushte të rënda ekonomike. Në këtë 8 mars, ajo nuk kërkon as lule e as urim, por ka vetëm një kërkesë, që dikush t’i ndihmojë me blerjen e barnave, për tu shëruar nga sëmundjet që vuan.
“Kushtet nuk i kemi, kurgjo jo, pension jo social, jo prej unazave jam sëmurë, gurët i kam, skam me cka me marr kurgjo, qe shikoni vet, skam me çka me i marr këto kokrra, qëto ilaqe”, ka thënë Kurtishi.
Ajo thotë se institucionet po interesohen fare pak për komunitetet rom, ashkali e egjiptian, për çka edhe shpesh po detyrohen të kërkojnë lëmoshë në rrugë.
“Me hanger me pi, dru jo kurgjo jo, social jo, kur po jam e sëmure po dal, me zgjat dorën, drejt me të tregu se s’mundem me te rrejt”, ka thënë tutje ajo.
Lagjja 29 në këtë komunë është e banuar kryesisht me komunitete rom, ashkali e egjiptian, dhe as në Ditën Ndërkombëtare të Gruas, nuk u panë lule duke u shitur.
Por, pak metra nga aty, në Prishtinë, realiteti është ndryshe. Madje, edhe kërkesat e grave ndryshojnë nga ajo që kishte Bedrie Kurtishi.
“Së pari për pensionera mundemi me fol, që duhet me u rrit pensionet, ato janë shumë sene, këto për neve si pensionera kjo është më e rëndësishmja”, ka thënë qytetarja tjetër, Biserka Jakupi.
“Unë e kam një kërkesë jam specializante e stomatologjisë, jena me vetëfinancim, në fakt një pjesë marrin subvencione një pjesë tjetër jo, kërkesa ish kanë që me u rregullu njëherë e mire, specializantët e stomatologjisë dhe të mjekësisë përgjithshme me qenë një lloj barazimi”, ka thënë Kaltrina Vokshi , qytetare.
8 marsi është Dita Ndërkombëtare e Gruas, e edhe në këtë vit, ani se Kosova qëndron larg respektimit të të drejtave të grave, lulet ishin dominante në sheshet e kryeqytetit.
Por, jo vetëm në Kosovë është problem respektimi i të drejtave të grave dhe hendeku gjinor.
Sipas raportit të 2022-s të Forumit Ekonomik Global, bazuar në praktikat aktuale do të duhen edhe 132 vjet që të arrihet barazi e plotë gjinore.