Këngëtarja e njohur kosovare, Adelina Ismaili, ka lansuar pesë këngë të reja në minialbumin me titull “Grua”, një projekt i dedikuar grave dhe vajzave që guxojnë të thonë “stop” dhunës dhe të ndërmarrin hapin për të ndarë jetën nga burra të lige.
Përmes rrjeteve sociale, Adelina ka shprehur mesazhin e fuqishëm që fshihet pas këtij projekti muzikor:
“Pesë këngë kushtuar atyre që filluan revolucionin e fundit në Kosovë. Grave e vajzave që guxojnë ti thonë STOP dhunës, e të braktisin burra të ligë. Për herë të parë në historinë e vendit tim, gruaja po tregon që din e mundet vet. Ju jeni forca. Ju jeni inspirimi. Ju jeni liria. Projekti GRUA është tingull i krenarisë për secilën nga ju!”, ka njoftuar Ismajli.
Minialbumi përfshin këngët me titujt: “Bajat”, “Baju”, “A je ti”, “Vet kom vendos” dhe “Liria është femër”.
Ky projekt synon të fuqizojë gratë në Kosovë dhe të nxisë ndërgjegjësimin për dhunën në familje, duke nxjerrë në pah fuqinë dhe pavarësinë e tyre.