Kreu i Organizatës së Veteranëve të Luftës së Ushtrisë Çlirimtare të Kosovës, Hysni Gucati, ka deklaruar se një dënim i ish-krerëve të Ushtrisë Çlirimtare të Kosovës nga Gjykata Speciale në Hagë do të ishte, sipas tij, më shumë se një goditje ndaj individëve.
Duke folur para qytetarëve të mbledhur në marshin për liri në mbështetje të ish-krerëve të UÇK-së që po gjykohen në Hagë, Gucati tha se protesta nuk është organizuar për të mbrojtur persona të caktuar, por për të mbrojtur të vërtetën e Kosovës dhe luftën për liri, njofton Dukagjini.
“Nuk jemi mbledhur për ta mbrojtur individin, por për ta mbrojtur të vërtetën e një populli që luftoi për lirinë. Jemi mbledhur për ta mbrojtur të vërtetën e Kosovës”, u shpreh Gucati.
Ai tha se UÇK-ja nuk ishte burim i shtypjes, por, sipas tij, u ngrit pikërisht kundër saj.
Mes tjerash, Gucati kërkoi që proceset gjyqësore ndaj ish-krerëve të UÇK-së të zhvillohen në mënyrë të drejtë dhe të paanshme.
“UÇK-ja nuk e krijoi shtypjen, ajo u ngrit kundër saj. Kërkojmë proces të drejtë dhe të paanshëm, me respekt për të drejtat e çdo të akuzuari”, u shpreh ai.