Drejtoresha e Kulturës në Komunën e Prishtinës, Sibel Halimi, ka bërë të ditur se hapësirat publike të Kryeqytetit po shndërrohen në qendra aktive të jetës artistike dhe kulturore.
Këtë e dëshmon edhe hapja e ekspozitës “Horizonte Mbarëshqiptare” të piktorit të njohur nga Shqipëria, Skënder Strica.
Ekspozita, e vendosur në hollin e Komunës së Prishtinës, përfaqëson një homazh për bukurinë, shpirtin dhe unitetin mbarëkombëtar.
Sipas Halimit, ky është një moment i veçantë për të nderuar një prej emrave më të shquar të peizazhit shqiptar dhe për të theksuar lidhjet e ngushta kulturore ndërmjet Shqipërisë dhe Kosovës.
Ekspozita do të jetë e hapur për publikun deri të premten, nga ora 10:00 deri në 16:00.
Kjo nismë kulturore vjen nën përkujdesjen e Drejtorisë së Kulturës në Kryeqytet dhe me përkrahjen e kryetarit të Komunës, Përparim Rama, si dhe personaliteteve të njohura si Petrit Malaj.