Drejtoresha për Kulturë në Komunën e Prishtinës, Sibel Halimi, ka reaguar ndaj situatës së krijuar në Teatrin Kombëtar, ku aktorët vazhdojnë të jenë në grevë për 40 ditë rresht.
Përmes një postimi Halimi ka akuzuar Qeverinë për indiferencë ndaj kërkesave të aktorëve për kushte më të mira pune dhe paga dinjitoze.
“Aktorët e Teatrit Kombëtar nuk ngrisin perden për shfaqjen e radhës.
Tragjikomedia e pushtetit vazhdon me një skenar të pamëshirshëm: as në fund të mandatit qeverisës, indiferenca nuk ndalet.
Prej 40 ditësh, aktorët e Teatrit Kombëtar janë në grevë, duke kërkuar të drejtat më bazike – kushte pune njerëzore dhe paga dinjitoze”,ka shkruar Halimi.
Halimi ka kritikuar ashpër qasjen e pushtetit ndaj kulturës dhe artistëve, duke e quajtur atë një “farsë cinike”.
“Por në këtë skenë absurde, ku artistët janë në grevë pushteti vazhdon të luajë një farsë cinike. Tregojnë moskokëçarje për kulturën dhe për ata që mbajnë gjallë shpirtin artistik të vendit.
Shikoni mirë këtë skenë! Sepse është pasqyrimi i vërtetë i një pushteti që rrënon artin dhe shpërfill dinjitetin njerëzor”, ka shtuar Halimi.