I ftuar në “Five” të RTV Dukagjini, Deputeti I Lëvizjes Vetvendosje (LVV), Enver Haliti, ka thënë se kontratat e energjisë në Korporatën Energjetike të Kosovës duhet të hetohen në qoftë se duan të ketë transparencë.
I ardhur nga seanca e Kuvendit të Kosovës, Haliti ka thënë se lëvizja Vetëvendosje është duke e mbështetur komisionin hetimor parlamentar, por jo vetëm atë i cili ka qenë i fokusuar vetëm në 4-mujorëshin e fundit.
Ai ka cilësuar veprimet e opozitës si rrjedhojë e mungesës së një kauze.
“Më shumë e shoh si zhurmë sesa inciativë të sinqertë”, ka thënë Haliti, gjersa ka shtuar se opozita po tenton të ndërhyjë në procesin gjyqësor me ZRrE-në.
Enver Haliti ka folur edhe për raportimin e mediumit slloven mbi raportin e përfshirjes së Martin Berishaj, ambasadorit të Kosovës në Kroaci, në një skandal financiar.
Ai mendon se Berishaj është përfshirë vetëm që të goditet qeveria Kurti dhe politika e jashtme e Kosovës.
“Nëse vërtetohen akuzat ndaj Berishajt, ai duhet të tërhiqet”, ka thënë Haliti, gjersa ka shtuar se në qoftë se Berishaj rezulton i mospërfshirë, deputetët e opozitës duhet t’i kerkojnë falje.
Enver Haliti u zgjodh deputet në Kuvendin e Republikës së Kosovës në zgjedhjet parlamentare të vitit 2019. Ai iu bashkua Lëvizjes Vetvendosje në qershor të vitit 2017.