Kryetari i Partisë Demokratike të Kosovës (PDK), Bedri Hamza, ka deklaruar se Kosova po përballet me sfida të shumta dhe se nevojitet angazhim më i madh institucional për të siguruar një të ardhme më të sigurt dhe më të mirë për qytetarët.
Në një reagim me rastin e Ditës së Punëtorëve, Hamza ka kritikuar qeverinë në detyrë, duke e akuzuar për mungesë angazhimi në adresimin e problemeve ekonomike dhe sociale që prekin qytetarët.
“Edhe këtë 1 Maj po e presim me shumë sfida: paga të ulëta, çmime të larta dhe një qeveri që e ka harruar punëtorin. Shumë prej jush punoni çdo ditë, por mezi ia dilni. Pa kushte të mira pune, pa siguri, pa mbështetje. Shumë familje në vendin tonë luftojnë çdo ditë për një jetë më të mirë.
Ky është realiteti ynë, të cilin duhet ta ndryshojmë së bashku.
Gëzuar 1 Majin, Ditën e Punëtorëve!
Duhet të angazhohemi më shumë që puna të respektohet, familjet të mbrohen dhe e ardhmja të jetë më e sigurt për të gjithë”, ka shkruar Hamza.