Kryetari i Partisë Demokratike të Kosovës (PDK), Bedri Hamza, i është përgjigjur me letër kryeministrit në detyrë Albin Kurti, duke e falënderuar për ftesën dhe letrën për takim.
Në përgjigjen e tij, Hamza rithekson se qëndrimi i PDK-së është bërë i qartë gjatë takimit të 10 korrikut dhe në përgjigjen zyrtare të 3 gushtit.
Ai thekson se, për shkak të dallimeve programore dhe konceptuale, PDK nuk do t’i bashkohet qeverisjes dhe do ta ushtrojë rolin e saj në opozitë.
Megjithatë, PDK shpreh gatishmërinë për të kontribuar në forcimin e demokracisë, mbrojtjen e interesit shtetëror dhe përfaqësimin e interesave të qytetarëve të Republikës së Kosovës.
Në letër kërkohet që, në përputhje me afatin e përcaktuar nga aktgjykimi i Gjykatës Kushtetuese, të ndërmerren hapat e nevojshëm për përmbylljen e konstituimit të Kuvendit dhe hapjen e rrugës për formimin e institucioneve të reja.
Në fund, Bedri Hamza thekson se Partia Demokratike e Kosovës do të japë kontributin e saj për konstituimin e Kuvendit.
