Kryetari i Mitrovicës, Bedri Hamza, dhe nënkryetari Arian Tahiri, kanë vizituar disa vende të Mitrovicës për të parë më afër gjendjen e vendbanimeve të prekura nga vërshimet.
Kryetari Hamza ka vizituar lagjen “Tjegullorja”, në këtë vend si pasojë e vërshimeve të lumit “Lushta”, janë shkaktuar dëme materiale.
“Gjatë kësaj vizite kryetari Hamza takoi edhe një grup të rinjsh nga organizata “7 Arte”, të cilët janë mobilizuar për pastrimin sipërfaqësor të lagjes së Tjegullores. Me këtë rast, kryetari Hamza, ka falënderuar këta të rinj dhe qytetarët e tjerë të cilët u treguan vullnetmirë dhe të gatshëm në pastrimin e kësaj zone dhe rikthimin sa më të shpejtë në normalitet”, njofton Komuna e Mitrovicës.
Tutje Hamza ka theksuar se komuna ka formuar edhe komisionet komunale të cilat do të bëjnë edhe evidentimin e dëmeve të shkaktuar jo vetëm në ekonomitë familje, biznese, infrastrukturë e bujqësi.
Mes tjerash kryetari i Mitrovicës ka theksuar se komuna do të marr përsipër që brenda mundësive financiare të bëhet edhe kompensimi i dëmeve, “por që në një gjendje të tillë jashtëzakonisht të rënduar pret reflektim e mbështetje edhe nga niveli qendror”, thuhet tutje në njoftim.