Ministria e Financave, Punës dhe Transfereve ka njoftuar qytetarët se të mërkurën e 2 nëntorit është hapur aplikimi edhe për fëmijët e lindur nga 1 janari i vitit 2010, që të përfitojnë nga Shtesat për Fëmijë.
Fëmijët e lindur në vitin 2010 tani do të përfitojnë 10 euro në muaj.
Ndërkaq, më 1 tetor ishte hapur aplikimi për shtesa për fëmijët e lindur nga viti 2011, ndërsa më 1 shtator për fëmijët e lindur në vitin 2012.
Më 27 shtator, kryeministri i Kosovës, Albin Kurti ka njoftuar se afro 200 mijë fëmijë dhe mbi 20 mijë lehona janë përfitues të shtesave.
Ndër të tjera, më 23 qershor, ministri i Financave, Hekuran Murati, kishte bërë të ditur se rishikimi i buxhetit ka mundësuar të zgjerohen skemat shtesë për fëmijët.
Gjatë fjalimit të tij në Kuvendin e Kosovës, Murati ka thënë se tashmë ka mjete të mjaftueshme që të zgjerohet skema për shtesat e fëmijëve.
“Meqë sot kaloi edhe rishikimi buxhetit, kam kënaqësinë t’i njoftoj edhe qytetarët që për shkak të kalimit të rishikimit, tani do të kemi mundësi që prej muajit të ardhshëm të fillojmë me zgjerimin e skemës për shtesat për fëmijë. Pra, nga muaji i ardhshëm do të fillojmë zgjerimin e skemës për shtesat për fëmijë, sepse tani me hyrjen në fuqi të rishikimit, kemi edhe fonde të mjaftueshme”, është shprehur Murati.
Fëmijët e lindur pas vitit 2015 i marrin nga 10 euro në muaj, ndërkaq ata që kanë lindur në dy vitet e fundit i marrin nga 20 euro.
Në anën tjetër, sa i përket mundësisë së tërheqjes së mjeteve nga Trusti pensional, ministri Murati ka deklaruar se tashmë është dhënë qëndrimi nga qeveria.
“Si qeveri tashmë kemi dhënë vendimin tonë se pse kjo çështje nuk duhet të kalojë dhe nuk duhet të shkohet tutje, sepse shkatërrohet një institucion e me atë institucion shkatërrohet edhe e ardhmja e pensionistëve”, shtoi ai.
“Shumë vite më parë nuk kemi pasur një sistem pensional, tash që e kemi bërë një sistem pensional tonin po duam ta rrënojmë vetë”.
Ndryshe, deputeti i Partisë Demokratike të Kosovës, Bekim Haxhiu, gjatë propozimit të tij, ka theksuar se kjo iniciativë ligjore ka ardhur si domosodshmëri për shkak të situatës nëpër të cilën po kalojnë qytetarët, krizës ekonomike dhe rritjes së çmimeve.
Hapet aplikimi për shtesa për fëmijët e lindur nga viti 2011