Qytetarët e Kosovës nga sot mund të aplikojnë për subvencionim të energjisë elektrike përmes platformës eKosova, në rubrikën Shërbimet – Grante dhe Subvencione.
Sipas njoftimit të Ministrisë së Financave, aplikimi bëhet në kuadër të Programit për Mbrojtjen e Konsumatorëve të Cenueshëm të Energjisë Elektrike, që mbulon periudhën 2025–2026.
Në njoftim thuhet se familjet që kanë aplikuar vitin e kaluar nuk kanë nevojë të riaplikojnë, pasi të dhënat e tyre janë bartur automatikisht për vitin e ardhshëm.
Megjithatë, Ministria sqaroi se në rast se ka ndryshime në të dhënat familjare, si numri i anëtarëve, vendbanimi apo njehësori elektrik, qytetarët mund t’i përditësojnë lehtësisht në të njëjtin formular, duke bërë ndryshimet përkatëse dhe më pas duke klikuar opsionin “Apliko”.
Ky program ka për qëllim të lehtësojë barrën financiare të familjeve në nevojë përmes mbështetjes në pagesën e faturave të energjisë elektrike.