Këtë herë, kanë ardhur të presin para administratës së SHSKUK-së me shpresën se pritja, do t’ia vlejë.

Punëtorët e sigurimit të Qendrës Klinike Universitare të Kosovës kanë qëndruar të premten deri në pritjen e hapjes së ofertës për tender, pas afateve të shtyra njëra pas tjetrës.

E deri atëherë, qëndrimin para derës së administratës do ta kenë të përditshëm.

“Punëtorët sot kanë ardhur me vullnet të mirë se i kemi njoftuar se do ketë risi të mira për t’ia filluar punës sa më shpejtë. Siç na kanë premtuar herën e kaluar, jemi optimist se oferta do hapet në orën 13:00, ne bëjmë pezullim të grevës në momentin kur nënshkruhet kontrata që të kthehemi në punë. Nëse s’ka vendim, javën tjetër do bllokojmë hyrjen”, ka thënë Hakif Sylejmani, Përfaqësues i punëtorëve grevistë.

Dhe ashtu ndodhi. Pas afro dy muajsh në pritje, procesi u nis e pritet të mbarojë javën që vjen.

“Procesi i prokurimit përfundoi. Përgjegjësi i prokurimit që ishim në kontakt dhe se procesi ka përfunduar. Neve nuk ka intereson cila kompani e ka marrë. Nënshkrimi i kontratës do bëhet të hënën dhe shpresoj që të martën, punëtorët do jenë në vendin e punës. Procesi përfundoi”, ka thënë Jusuf Azemi, Kryetari i Sindikatës së Pavarur të Sektorit Privat.

Duke qenë se procesi i tenderimit nuk është publikuar në faqen zyrtare, lë të nënkuptohet se kontrata është një burimore, ashtu siç ka ndodhur rëndom edhe herat e kaluara.

Televizioni ka tentuar të marrë përgjigje edhe nga Drejtoria e QKUK por edhe nga ajo e SHSKUK-së lidhur me garancinë e kthimit në punë të martën, por nga të njëjtit, nuk ka pranuar përgjigje.

Një reagim nuk ka pasur as nga Ministria e Shëndetësisë e cila ka përcjellë për së afërmi procedurën, duke paralajmëruar masa nëse kjo situatë vazhdon.

Që nga 22 qershori, punëtorët e sigurimit në QKUK janë në grevë dhe kanë mbajtur edhe protesta duke kërkuar garancinga drejtoria e SHSKUK-së për kushte më të mira pune dhe rikthimin e tyre nën menaxhimin e QKUK-së.