Kryetari i Aleancës për Ardhmërinë e Kosovës, Ramush Haradinaj, në kujtim të Betejës së Çabratit, ka nderuar heroizmin e Brigadës 137 “Gjakova” dhe trimat e rënë.
Në një postim në Facebook, Haradinaj ka thënë se Gjakova, vatër e atdhedashurisë dhe e shqiptarisë ndër breza, i fali shumë lirisë së atdheut.
“Në Ushtrinë Çlirimtare të Kosovës, anembanë vendit, Gjakova dha luftëtarë të mëdhenj. Djemtë e vashat e Gjakovës ishin shembulli më i mirë i luftëtarëve të lirisë që nga mobilizimi e deri te dita e fitores. Gjatë luftës për liri, në këtë trevë u shkatërruan shumë ekonomi familjare e shumë vëllezër e motra tona pësuan nga dora e agresorit, por shpirti liridashës e atdhetar i Gjakovës nuk u shua asnjëherë”, shkroi Haradinaj.
Kreu i AAK-së është shprehur krenar dhe mirënjohës për sakrificën që heronjtë dhanë për lirinë e vendit.
“Përgjithmonë krenarë që kisha në krah bashkëluftëtarë si Heronjtë gjakovarë që i kujtuam sot. Përgjithmonë krenarë me heroizmin dhe mirënjohës për sakrificën e popullit tonë për liri”.