Kreu i AAK-së, Ramush Haradinaj ka deklaruar se nuk do të pranonte një takim me kreun e LVV-së lidhur me situatën aktuale të konstituimit të Kuvendit të Kosovës. Ai tha se e drejtë e secilit deputetë është votimi, por që ai bëhet në tri mënyra: pro, kundër apo abstenim.

Ai u shpreh se ka informacione që po bëhen përpjekje për një kandidat më unifikues për kryeparlamentar.

“Po shpresojmë të kemi kandidat unifikues, që të ndodh propozim i ri. Shpresojmë ta votojmë kryeparlamentarin. Kam dëgjuar që ka përpjekje për ta ndërruar kandidatin, për ta vendosur një kandidat më unifikues”, ka thënë Haradinaj para hyrjes në Kuvend.

Gjatë një deklarimi të djeshëm, kryetari i AAK-së e la të hapur mundësinë ta votojë edhe Glauk Konjufcën për kryeparlamentar. AAK-ja insiston që Albulena Haxhiu nuk është kandidate unifikuese.

Haradinaj në deklarimin e sotëm shtoi se kryeministri e ministrat që po ushtrojnë detyrën edhe pse janë zgjedhur deputetë po shkelin ligjin dhe për këtë ka paralajmëruar kallëzim penal, ashtu si LDK-ja.