Kryetari i Aleancës për Ardhmërinë e Kosovës, Ramush Haradinaj, ka thënë se dialogu dhe qeverisja në Kosovë janë në rrugë të gabuar.
Në fjalën e tij në seancën plenare në Kuvendin e Kosovës, Haradinaj ka kërkuar nga deputetët që të bashkohen e ta shkarkojnë Qeverinë e udhëhequr nga kryeministri Albin Kurti.
“Rrugë e cila po i shkakton humbje, po i sjell goditje Kosovës. Mund t’i listoj ato humbje dhe goditje për Kosovën. Janë të shumta, i keni dëshmu e shpjegu shumë nga ju. Tani nëse ne në parlament e shohim qeverinë tonë që e udhëheq vendin në drejtim të gabuar dhe i sjell vendit humbje të njëpasnjëshme, si të veprohet ju lutem? Nëse dikush prej nesh ende shpreson që qeveria Kurti do ta nxjerrë Kosovën nga drejtimi i gabuar, drejtimi humbës e nga sanksionet, jam i bindur se do të dalë gabim. Nuk besoj që duhet të presim që ai që e ka sjellë Kosovën në pozitën e të ndëshkuarit, goditjeve, humbjeve të njëpasnjëshme edhe në planin e brendshëm të sigurisë dhe të atij ndëkrombëtar, të shpresojmë që ai do ta nxjerrë”, u shpreh ai.
Sipas tij, nëse vazhdohet të heshtet në këtë situatë, që Haradinaj e përshkruan si jo të mirë, “për fat të keq po bëhemi bashkëpjesëmarrës të përkeqësimit të situatës në vend”.
“Besoj që është detyrë e parlamentit ta nxjerrë Kurtin dhe Qeverinë Kurti nga drejtimi i gabuar, detyrë e të gjithë deputetëve. Ne si parlament duhet t’i marrim përgjegjësitë. Ne që ia kemi dhënë besimin Qeverisë Kurti, ju lutem shqyrtojeni se a është në rregull që të vazhdohet në drejtim çfare e kemi në vend apo të gjithë ne ta ndihmojmë Kosovën, Kurti, me mocion, ta shkarkojmë Qeverinë Kurti. Ta nxjerrim Kurtin dhe Kosovën nga drejtimi i gabuar”, shtoi ai.