Kryetari i Aleancës për Ardhmërinë e Kosovës (AAK), Ramush Haradinaj, ka reaguar pas shpërthimit të fundit në kanalin e ujit të Ibër-Lepencit, në Zubin Potok, duke akuzuar Qeverinë e Kosovës dhe Lëvizjen Vetëvendosje për mungesë qasjeje proaktive dhe politika të gabuara në veriun e vendit.
Shpërthimi në kanalin e Ibër-Lepencit në Zubin Potok, ndërpritet furnizimi me ujë të pijes
Haradinaj tha se shpërthimet e fundit, përfshirë atë në Zubin Potok, janë dëshmi e paaftësisë së institucioneve për të menaxhuar situatën dhe për të mbrojtur infrastrukturën strategjike të Kosovës.
“Shpërthimi i sotshëm në Ibër si edhe shpërthimi i mëparshëm në Zubin Potok manifeston mungesën e qasjes proaktike të Qeverisë së Kosovës dhe është pasojë e një politike krejt të gabuar të Qeverisë dhe Lëvizjes Vetëvendosje në këtë pjesë të Kosovës.
Institucionet e sigurisë të punojnë ngushtë me KFOR dhe prezencën amerikane.
Naivitieti dhe mosnjohuria me esencën e problemit nga ana e zyrtarëve politikë të Qeverisë po rrezikon infrastrukturën strategjike të Kosovës.
Mjaft më me filma!”, ka shkruar Haradinaj në Facebook.
Këto komente vijnë pas shpërthimit që ndodhi në fshatin Varagë të Zubin Potokut, ku u dëmtua rëndë kanali i ujit të Ibër-Lepencit, duke shkaktuar rrjedhje të pakontrolluar të ujit dhe ndërprerje të furnizimit.
Policia e Kosovës është duke hetuar rastin, ndërsa KRU “Mitrovica” ka njoftuar qytetarët për ndërprerjen e furnizimit.