Kryetari i AAK-së, Ramush Haradinaj, i ka bërë thirrje kryeministrit të vendit, Albin Kurti, përmes një postimi në rrjetin social Facebook, për hapjen e shkollave, pasi greva në arsim të dielën e 25 shtatorit ka mbushur një muaj.
“Ndale grevën ose jep dorëheqje Albin Kurti”, ka shkruar Haradinaj.
Tutje, kryetari i AAK-së është shprehur që kryeministri, ose duhet ta pranojë se është i paaftë, ose duhet të gjejë një zgjidhje.
Paaftësia e Kurtit sipas Haradinajt, shihet te fakti se ai debaton me sindikatat, në të njëjtën kohë tallet me popullin.
“Sindikatat mund të jenë aty për t’ia nxirë jetën atij e çdo kryeministri tjetër dhe mund të jenë kundër tij e me dreqin e me të birin, por ai që duhet të gjejë zgjidhje është kryeministri e askush tjetër!”, ka theksuar ai.
Haradinaj i bëri thirrje kryeministrit të shkarkojë ministren e Arsimit dhe të hapë shkollat, duke e akuzuar që një gjë të tillë e ka bërë për shkak të kryeneçësisë së tij.
“Kush je ti që i ke dhënë të drejtë vetes që t’i lësh në rrugë 300 e sa mijë fëmijë!? A e di që e ke bllokuar krejt shtetin me kryeneçësinë tënde! Shkarkoje që sonte ministren e Arsimit dhe merr vendim për hapjen e shkollave. Mos shko më larg, sepse edhe ashtu ke kapërcyer çdo kufi! Boll ma!”, ka përfunduar ai.