Kreu i AAK-së, Ramush Haradinaj, e ka përkujtuar masakrën e Dubravës në 24-vjetorin e kësaj ngjarjeje të rëndë për popullin e Kosovës.
Haradinaj tha se kjo ngjarje e shpërfaqi qartë mendësinë gjenocidale të Serbisë.
“Masakra e Dubravës shpërfaqi qartë mendësinë gjenocidale të shtetit serb, ku si synim kryesor kishte zhdukjen e qenies shqiptare përmes spastrimit etnik, masakrave kudo në Kosovë e dëbimin me dhunë të më shumë se të gjysmës së popullatës nga trojet e tyre”, tha ai.
I pari i AAK-së theksoi se ky krim është mjaft mirë i dokumentuar, por megjithatë askush nuk është dënuar.
“Edhe pse këto masakra janë mirë të dokumentuara, ende askush nuk është përballur me drejtësinë. Shteti serb, edhe më tutje refuzon të pranojë të vërtetën dhe të përgjigjet për krimet e kryera e ne nuk duhet të ndalemi në betejën tonë për zbardhjen e të vërtetës”, ka thënë ai.
Tutje, Haradinaj tha se liria që e ka sot Kosova është rezultat “i një çmimi shumë të lartë”.
“Sakrifica e të rënëve mbetet motivim për angazhim të gjithanshëm për ta dashur atdheun e për ta zhvilluar shtetin ashtu siç ëndërruan ata”, tha ai.