“A i keni sytë në ballë për të parë?!”
Kështu e ka filluar reagimin e tij, Kryetari i Aleancës për Ardhmërinë e Kosovës, Ramush Haradinaj, lidhur me krizën energjetike, e cila sipas tij, mbetet e padukshme përgjatë sezonës së verës.
Sipas Haradinajt, e rrugës do të ishte të ndërtohej një “plan krize” nga Qeveria e Kosovës ashtu që të ishte më e përballueshme. Sjelljen e kësaj të fundit, e ka komentuar sikurse “komoditet”, dhe ky “komoditet” i saj, sipas tij, mund të sjellë pasoja katastrofike për vendin.
“Sjellja me komoditet e qeverisë sot, në raport me krizën energjetike në prag, mund të ketë pasoja katastrofike për vendin”, ka shkruar Haradinaj në Facebook.
Ndër të tjera, ai ka thënë se “është urgjente që gjatë sezonit të verës të aftësohen termocentralet e Kosovës, duke u bërë remontet e nevojshme të blloqeve të tyre, që menjëherë e pa vonesë të shikohet mundësia e një ‘marrëveshjeje krize’ me Shqipërinë për shkëmbim të energjisë (të jepet verës e të importohet dimrit, të krijohen rezerva të naftës, benzinës dhe gazit, të liberalizohet tregu i burimeve konvencionale për ngrohje, së paku deri në mars të vitit të ardhshëm, (thëngjilli dhe lëndët drusore) dhe krijohet një fond emergjent për energjinë dhe ngrohjen për dimër dhe natyrisht të rikthehet çmimi i rrymës atje ku ishte…”
Përmes një postimi më 6 prill në Facebook, Haradinaj kishte ftuar prokurorinë të hetojë, siç thotë ai, fryerjen e faturave të energjisë elektrike.
Ndërkaq, para pak ditësh, RTV Dukagjini raportoi se kompania serbe “Elektrosever” e ka shkelur marrëveshjen për energjinë elektrike për katër komunat veriore të Kosovës, e nënshkruar në Bruksel.
Kompania serbe nuk e ka respektuar pikën e dytë në udhërrëfyesin për energjinë, dokument për të cilin janë pajtuar Kosova dhe Serbia. Aty thuhet se shtatë ditë pas marrëveshjes, “Elektrosever” siguron të dhënat më të fundit për konsumatorët.
Se kjo marrëveshja nuk është respektuar e ka konfirmuar për RTV Dukagjini, Operatori i Sistemit, Transmisionit dhe Tregut të Energjisë Elektrike në Kosovë, “KOSTT”.