Ish-kryetari i AAK-së, Ramush Haradinaj, i është bashkuar përkrahjes për “Marshin për Liri”, i cili do të mbahet më 12 shtator në sheshin “Skënderbeu” në Prishtinë.
Haradinaj ka bërë thirrje që qytetarët t’i bashkohen marshit, i cili organizohet në mbështetje të ish-krerëve të UÇK-së, Hashim Thaçi, Kadri Veseli, Jakup Krasniqi dhe Rexhep Selimi.
“Më 12 shtator, të gjithë bashkë në sheshin ‘Skënderbeu’ në Prishtinë! Në përkrahje të çlirimtarëve. Në përkrahje të drejtësisë. I presim në Kosovë!”, ka shkruar Haradinaj.
“Marshi për Liri”, i organizuar nga platforma qytetare “Liria ka Emër”, mbahet nën moton “Kosova po pret”, katër ditë para seancës së fundit të procesit gjyqësor ndaj ish-krerëve të UÇK-së në Hagë.