Kryetari i Aleancës për Ardhmërinë e Kosovës (AAK), Ramush Haradinaj, ka kujtuar Betejën e Morinës në 25-vjetorin e saj.
Përmes një postimi në Facebook, Haradinaj ka thënë se Beteja e Morinës shënoi një kapitull të ri për luftën çlirimtare në Zonën Operative të Dukagjinit, duke theksuar se djemtë që ranë në altarin e lirisë u bënë frymëzim për mijëra ushtarë të tjerë.
“Atë ditë ranë në altarin e lirisë djemtë më të zotë të Ushtrisë Çlirimtare të Kosovës. Rënia e tyre ishte goditje e madhe për rrjedhën e luftës, por ata u bënë frymëzim për mijëra ushtarë të tjerë për t’ju bashkuar radhëve të UÇK-së. Lavdi të gjithë atyre që luftuan dhe ranë për lirinë e Kosovës! Respekti dhe mirënjohja për sakrificën e tyre sublime do të jetë i përhershëm”, ka shkruar Haradinaj.
Dëshmorët e rënë në Betejën e Morinës janë, Muhamet Ukshini, Arben Ukshini, Blerim Ukshini, Shkelzen Syla, Sylejmon Abdyli, Fisnik Salihu, Ymer Bytyqi, Nezir Elezaj dhe Ahmet Pulatani.
Po ashtu, edhe kryeministri i Kosovës, Albin Kurti, ka përkujtuar Betejën e Morinës, ku ranë nëntë ushtarë të UÇK-së, që po luftonin kundër forcave serbe.
Ai theksoi rëndësinë e krijimit të një korridori për furnizim me armë nga Shqipëria në Kosovë nëpërmjet fshatit Morinë të Gjakovës.