Kryetari i Aleancës për Ardhmërinë e Kosovës[ AAK-së], Ramush Haradinaj, ka reaguar pas largimit të Listës Serbe nga Komisioni Komunal Zgjedhor (KKZ) dhe për thirrjet që serbët e Kosovës të bojkotojnë regjistrimin e popullsisë.
Ai ka kërkuar që politika e Beogradit të heqë dorë nga instrumentalizimi i serbëve të Kosovës
Haradinaj ka thënë se thirrja për bojkot të regjistrimit të popullsisë është në kundërshtim me normat demokratike dhe në dëm të vetë serbëve.
“Thirrjet e Listës Serbe që serbët e Kosovës ta bojkotojnë regjistrimin e popullsisë, si dhe tërheqja e anëtarëve serbë nga komisionet komunale zgjedhore në veri, janë në kundërshtim me normat demokratike dhe në dëm edhe të vetë qytetarëve serbë. Ata duhet të jenë pjesë e proceseve që rrisin mirëqenien, sigurinë dhe përparimin e tyre”, ka thënë Haradinaj.
Haradinaj ka shtuar se këto procese nuk duhet të lidhen me agjendat politike të Beogradit.
“Këto procese nuk duhet të lidhen me agjendat politike të Beogradit. Regjistrimi i popullsisë është interes i të gjithë qytetarëve, përfshirë edhe qytetarët serbë dhe në asnjë rrethanë nuk mund të ndikohet nga agjendat politike. Politika e Beogradit duhet të heqë dorë njëherë e përgjithmonë nga instrumentalizimi i serbëve të Kosovës për agjenda politike”, është shprehur Haradinaj.