Kryetari i Aleancës për Ardhmërinë e Kosovës (AAK), Ramush Haradinaj, ka reaguar pas sulmit të gazetarit Valon Sylaj mbrëmjen e së martës.
Me anë të një postimi në Facebook, Haradinaj e ka cilësuar “qyqar” sulmin ndaj Sylajt, gjersa ka bërë apel për zbardhjen e rastit tek organet e sigurisë.
“I papranueshëm sulmi qyqar ndaj gazetarit Valon Syla! Apeloj tek organet e rendit që të zbardhin rastin dhe uroj të jetë i fundit! Fjala e lirë është garancë e demokracisë në një shoqëri që aspiron një të ardhme të sigurt”, ka shkruar Haradinaj.
Valon Sylaj u sulmua mbrëmjen e së martës nga tre persona. Ai pranoi tretman mjekësor në QKUK pas sulmit.
Në një përgjigje për Dukagjinin, drejtori i Emergjencës Naser Syla bëri të ditur se gazetarit Syla po i përfundoheshin ekzaminimet dhe se pritej të lirohej nga spitali.
Dukagjini siguroi edhe një përgjigje të shkurtër nga ana e Sylajt.
“Tre islamikë fanatikë më kanë sulmuar, shpejt e shpejt ka ndodhur edhe kanë ik”, tha ai.
Syla ishte duke folur akoma kur gazetarit të RTV Dukagjinit iu pengua filmimi nga Policia e Kosovës. Ai dëgjohet duke thënë se është shtyrë fizikisht nga sigurimi i spitalit.