Ushtruesja e detyrës së presidentes së Kosovës, Albulena Haxhiu, ka dekoruar grupin muzikor “Marigona” për kontributin e dhënë në promovimin e vlerave muzikore dhe për rolin e tij në zhvillimin e skenës rok në Kosovë.
Haxhiu ka thënë se grupi “Marigona” është pjesë e gjeneratës së artë të rokut kosovar dhe se krijimtaria e tyre ka mbetur pjesë e një periudhe të rëndësishme të zhvillimit kulturor të vendit, njofton Dukagjini.
“Sot dekorova grupin ‘Marigona’ për promovimin e vlerave muzikore, si pjesë e gjeneratës së artë të rokut në Kosovë. Këngët e tyre mbeten pjesë e një periudhe të rëndësishme të zhvillimit kulturor të Kosovës dhe vazhdojnë të dëgjohen me të njëjtën dashuri edhe sot”, ka shkruar Haxhiu.
Ajo ka vlerësuar se përmes krijimtarisë dhe veçantisë artistike, grupi “Marigona” ka lënë gjurmë të qëndrueshme në muzikën kosovare dhe në kujtesën e shumë brezave.
“Me krijimtarinë dhe veçantinë e tyre artistike, grupi ‘Marigona’ ka lënë gjurmë të qëndrueshme në muzikë dhe në kujtesën e shumë brezave”, ka shkruar Haxhiu.