Edhe pas shtatë vitesh nga vdekja e aktivistit të Lëvizjes Vetëvendosje, Astrit Dehar, i cili vdiq në qelinë e paraburgimit në Prizren më 5 nëntor 2016, ende nuk është dhënë përgjegjësi.
Ministrja e Drejtësisë, Albulena Haxhiu, ka thënë se drejtësia për Astritin duhet të ndodhë dhe nuk mund të vonohet më gjatë.
Në një postim në Facebook, Haxhiu thotë se “provat ekzistojnë dhe gjithçka që duhet është vullneti i policisë dhe prokurorisë për ta zbardhur deri në fund këtë rast”.
Ajo pretendon se hetime të ndryshme janë zhvilluar, sikurse edhe përpjekjet për ta “fshehur këtë krim”.
“Krimi ndaj Astrit Deharit, përfshinë një sërë veprimesh për të cilat ende askush nuk dha përgjegjësi. I paraburgosur, pa aktakuzë, pa gjykim, pa dënim, për 68 ditë në burg, Astrit Dehari nuk u mor asnjëherë në pyetje. Në burgun e Prizrenit, më 5 nëntor, Astrit Dehari u vra në rrethana të sqaruara nga ekspertë të mjekësisë ligjore dhe Raporti i Institutit Zviceran nga Lozana, por të pa sqaruara nga aturoritetet e drejtësisë”, shkroi ajo.
Haxhiu thekson se një sërë anomalish institucionale vërehen menjëherë pas gjetjes së trupit të Astrit Deharit.
“Që nga vonesa e ndihmës mjekësore, tek nxitimi i deklarimeve të Kryepolicit të rajonit të Prizrenit, Nexhmi Krasniqi, e po ashtu Kryeprokurorit i Prokurorisë Themelore në Prizren, Sylë Hoxha. Njëri konstatonte se Astriti vdiq nga mbi doza e medikamenteve, kurse tjetri e cilësoi si vetëvrasje ende pa nisur asnjë hetim”.
Ajo potencon se Ministria e Drejtësisë ka bërë gjithçka që lejojnë kompetencat e saj dhe se i mbetet institucioneve të drejtësisë të veprojnë dhe të sjellin rezultate ndaj këtij krimi “ende të errësuar”.