Ministrja e Drejtësisë, Albulena Haxhiu ka reaguar pas votimit të Ligjit për Këshillin Prokurorial të Kosovës (KPK) duke thënë se tashmë do ketë eliminim të koorporatizmit dhe grupeve klanore në Këshill.
Haxhiu nuk i përmendi kritikat dhe rekomkandimet e BE-së, por vetëm u shpreh se do ketë rritje të llogaridhënies, integritetit dhe profesionalizmit në sistem.
“Pas një maratone të shoqëruar me jo pak sfida e pengesa, më në fund votohet versioni i ri i ndryshimeve të Ligjit për Këshillin Prokurorial të Kosovës. Reforma e shumëpritur, do ta ri-organizojë Këshillin Prokurorial – me eliminim të korporatizmit dhe grupeve klanore në Këshill, e me rritje të llogaridhënies, integritetit dhe profesionalizmit në sistem”, ka shkruar Haxhiu në Facebook.
Haxhiu ka thënë tutje se ndryshimet e votuara sot në lexim të dytë në Kuvend, janë bërë në përputhje të plotë me rekomandimet e Komisionit të Venedikut, por edhe me aktgjykimin e Gjykatës Kushtetuese teksa ka shtuar se mbetet e përkushtuar në rrugën reformuese për një sistem llogaridhënës e profesional.
“Ndryshimet e votuara sot në lexim të dytë në Kuvend, janë bërë në përputhje të plotë me rekomandimet e Komisionit të Venedikut, por edhe me aktgjykimin e Gjykatës Kushtetuese. Mbetemi të përkushtuar e të angazhuar në rrugën tonë reformuese, për një sistem llogaridhënës e profesional, të besueshëm dhe të pandikueshëm, e të qasshëm për të gjithë qytetarët”, ka vijuar Haxhiu.
BE kishte thënë se Kosova nuk kishte kërkuar opinion përcjellës nga Komisioni i Venecias, përkundër faktit se me vendosjen e Komisionit Parazgjedhor, plotësim/ndryshimet parashikojnë një strukturë të re institucionale për emërimin e anëtarëve joprokurorë.
BE kishte rekomanduar që të rikonsultohet Komisioni i Venecias për këtë projektligj, derisa kishin theksuar: Andaj, BE-ja përsërit rekomandimin e vet të fortë që të rikonsultohet Komisioni i Venecias për këtë projektligj. BE-ja thekson më tej me shqetësim se përkundër këshillave dhe mbështetjes sonë të vazhdueshme që i kemi dhënë qeverisë dhe komisioneve përkatëse të Kuvendit, komentet tona nuk janë marrë parasysh, duke përfshirë ato në lidhje me rritjen e pluralizmit dhe pavarësisë së Komisionit Parazgjedhor për të siguruar përafrimin me standarde evropiane.