Kryeparlamentarja, Albulena Haxhiu, ka mirëpritur vendimin e Qeverisë për themelimin e Grupit Punues, i cili do të bashkërendojë mbështetjen shtetërore për ish-krerët e Ushtrisë Çlirimtare të Kosovës në procesin e Apelit.
Haxhiu e ka cilësuar të padrejtë dhe të pasaktë aktgjykimin e 16 shtatorit, duke theksuar se në këtë fazë është e rëndësishme që procesi i Apelit të mbështetet nga një strategji e përbashkët shtetërore, njofton Dukagjini.
Ajo ka kërkuar angazhim të koordinuar dhe mbështetje të plotë institucionale për ish-krerët e UÇK-së në këtë proces teksa ka shtuar se edhe Kuvendi i Kosovës do të jetë pjesë e këtij angazhimi.
Sipas saj, në mbledhjen e ardhshme të Kryesisë së Kuvendit do të propozojë delegimin e një përfaqësuesi të Kryesisë në Grupin Punues.
“Kuvendi do të jetë pjesë e këtij angazhimi. Në mbledhjen e ardhshme të Kryesisë, do të propozojmë delegimin e një përfaqësuesi të Kryesisë në këtë Grup Punues, në funksion të kontributit institucional për një mbrojtje sa më të mirë në procesin e Apelit. Lufta e UÇK-së ishte luftë e drejtë dhe çlirimtare. Kjo e vërtetë do të vazhdojë të thuhet dhe të mbrohet gjithmonë”, ka shkruar Haxhiu.