Lista e veteranëve të UÇK-së duhet të pastrohet sa më shpejtë, në mënyrë që veteranët e vërtetë të mos pësojnë si pasojë e atyre që përfitojnë nga ky status, është shprehur ministrja Haxhiu.
Ajo ka thënë që do të donim t’i kishim 60-të mijë veteranë, por nuk i kemi.
“Ministria e Drejtësisë do të ndihmojë në çfarëdo instance që bëhet dhe të delegojë një përfaqësues. Listat e veteranëve duhet të pastrohen. Ne pajtohemi se nuk i kemi pasur 60-të mijë veteranë. Do të donim t’i kishim, por si kemi pasur. I kemi pasur rreth 20-të mijë. Nuk e di që dikush mundet sot të deklarojë se kanë qenë 60-të mijë veteranë luftëtarë”, ka deklaruar Haxhiu.
Ajo më tej ka shtuar që është koha që veteranët e vërtetë të trajtohen siç e meritojnë.
“Për shkak të këtij numri të fryrë e të madh, që është bërë komplet për vota në të kaluarën, ne nuk po mundemi që nevojat reale që i kanë veteranët luftëtar t’ua plotësojmë. Është koha e fundit kur duhet t’i trajtojmë seriozisht dhe siç duhet ata që kanë dhënë gjithçka që Kosova sot me qenë e lirë”, ka u shpreh Haxhiu në “RTK Prime”.
Ajo ka thënë që kjo çështje do të zgjidhet me fillimin e një procesi të ri për rivlerësimin e veteranëve.