Deputeti i Partisë Demokratike të Kosovës (PDK), Bekim Haxhiu, ka theksuar shqetësimin për ikjen masive të profesionistëve shëndetësorë nga Kosova.
Ai ka thënë se deri më 1 qershor 2024, mbi 3,860 profesionistë shëndetësorë kanë lënë vendin në tri vitet e fundit, dhe shumë të tjerë janë transferuar nga sektori publik në atë privat, duke krijuar një situatë alarmante për sistemin shëndetësor të Kosovës.
“Ikja e profesionistëve shëndetësorë është shndërruar në një dukuri shqetësuese për sistemin tonë shëndetësor, ka deklaruar Haxhiu, duke shtuar se ky fenomen do të mund të çojë në kolapsin e sistemit shëndetësor nëse vazhdohet me këtë ritëm.
Për këtë situatë, ai ka thënë se është shkak i keqqeverisjes dhe paaftësisë së qeverisë, duke përmendur se statuti i SHSKUK-së parashikon mbylljen e disa shërbimeve në spitalet regjionale.
Sipas tij, korrupsioni në sektorin e shëndetësisë ka rënduar edhe më shumë situatën, duke dekurajuar profesionistët shëndetësorë.
“Kjo është pasojë e keqqeverisjes ku edhe me statutin e SHSUKS parashihet mbyllja e disa prej shërbimeve në spitalet regjionale. Paaftësia e qeverisë, keqqeverisja në shëndetësi korrupsioni në këtë sektor ka rënduar edhe më shumë gjendjen në shëndetësi dhe ka dekurajuar profesionistët shëndetësorë”, ka deklaruar Haxhiu ne seancën plenare të Kuvendit të Kosovës.