Ministrja e Drejtësisë, Albulena Haxhiu, e ka ripërsëritur atë që e ka thënë para disa ditëve në Kuvendin e Kosovës, se në Kosovë ekziston femicidi, që i bie se gratë vriten vetëm për arsye se janë gra.
Haxhiu në emisionin “Five”, tha se një pjesë e burrave për shkak të mentalitetit patriarkal, mendojnë se kanë të drejtë të vendosin për jetët e grave.
“Mendoj që ekziston fenomeni i dhunës në familje dhe ekziston femicidi, që nga viti 2000 deri në 2022 kemi pasur 66 gra nga partnerët, bashkëshortët dhe ish-bashkëshortët. Po është femicid në Kosovë, për shkak të mentalitetit patriarkal, një pjesë e burrave konsiderojnë që kanë të drejta mbi trupin e grave, kanë të drejta që t’ua cenojnë të drejtat atyre, dhe të vendosin vetë për jetën e tyre”, ka thënë ajo.
Sipas saj nëse mohohet femicidi është problem shumë i madh për shoqërinë Kosovare.
“Jo vetëm në Kosovë, por edhe në Ballkan edhe kudo tjetër ekzistojnë raste të tilla, duhet ta pranojmë këtë në mënyrë që ta gjejmë mënyrën se si ta luftojmë. Nëse themi nuk ka femicid në Kosovë në ndërkohë gratë vriten atëherë mendoj që kjo është problem i madh”, ka thënë ajo.
Ministrja Haxhiu, u shpreh se Qeveria e Kosovës, është duke punuar mjaft shumë në mënyrë që dhuna ndaj grave të minimizohet.