Ish-ministrja e Drejtësisë dhe nënkryetarja e Kuvendit, Albulena Haxhiu, ka reaguar pas ngritjes së aktakuzës nga Prokuroria Speciale ndaj ministres së Industrisë, Ndërmarrësisë dhe Tregtisë, Rozeta Hajdari, në lidhje me çështjen e rezervave shtetërore, ku sipas Prokurorisë dëmi i shkaktuar i afrohet 3 milionë eurove.

Në një reagim në Facebook, Haxhiu e ka mbrojtur Hajdarin, duke e cilësuar aktakuzën si të motivuar politikisht dhe të ndikuar nga interesa të jashtme ndaj drejtësisë.

“Kaherë kemi theksuar se hetimet ndaj Ministres Hajdari janë të ndikuara, dhe ngritja e aktakuzës ndaj saj e vërteton këtë. Ministrja Hajdari as nuk është e korruptuar, as nuk ka keqpërdorur ndonjëherë detyrën e saj zyrtare. Për këtë rast jam e njoftuar në çdo detaj, pasi edhe Avokatura Shtetërore ka qenë e përfshirë me qëllim të mbrojtjes së interesit publik.

Kjo aktakuzë është e motivuar politikisht, pa asnjë bazë reale dhe dukshëm e qëllimshme.
Ministrja ka bërë gjithçka që ka qenë në dorën e saj për të mbrojtur interesin e vendit dhe për të siguruar që Kosova të ketë rezerva shtetërore, ndryshe nga qeveritë e kaluara, të cilat kishin lënë vendin pa rezerva.
Është e qartë se ekziston një tendencë për të njollosur figurën e saj.
Drejtësia duhet të mbështetet në fakte dhe në punën e bërë, e jo në ndikime apo qëllime politike”, ka shktuar Haxhiu.