Deputeti i Partisë Demokratike të Kosovës (PDK), Bekim Haxhiu, në seancën e së enjtes në Kuvend ka kritikuar Qeverinë se ka mungesë të udhëheqësve nëpër institucione.
Haxhiu ka thënë se bëhen dy muaj prej se Trusti është pa bord, teksa e ka quajtur mazhorancën të papërgjegjshme për shkak se nuk votoi dy herë projektligjin për Trustin.
“Po bëhen gati dy muaj që trusti është pa bord, pa menaxhim të kontributdhënësve pensionalë të Kosovës, kjo mazhorancë e papërgjegjshme e rrëzoi dy herë projektligjin për trustin, tash sillet me padituri duke rrezikuar mjetet e Trustit”, ka thënë Haxhiu.
Ai i ka bërë kërkesë Qeverisë që të trajtojë projektligjin për trustin dhe reformën pensionale, sepse sipas tij po vazhdojnë të thellohen edhe më shumë humbjet në trust.
“Asnjë veprim i qeverisë për të kthyer në kuvend projektligjin për pensionet dhe reformën”, ka vijuar ai.
Ndryshe, në këtë seancë në rend dite janë shtatë pika dhe në mesin e tyre është edhe shqyrtimi i dytë i projektligjit për Prokurorin e Shtetit.