Ushtruesja e detyrës së presidentes së Kosovës, Albulena Haxhiu, ka falënderuar organizatorët dhe qytetarët që morën pjesë në Marshin për Liri të mbajtur sot në Prishtinë.
Haxhiu ka vlerësuar se qytetarët e shprehën në mënyrë paqësore dhe dinjitoze qëndrimin e tyre për luftën e Ushtrisë Çlirimtare të Kosovës, njofton Dukagjini.
“Falënderoj organizatorët e Marshit për Liri dhe qytetarët që sot dolën në Prishtinë për ta shprehur paqësisht dhe me dinjitet një qëndrim që në Kosovë ka qenë dhe mbetet i qartë”.
Haxhiu ka deklaruar se lufta e UÇK-së ishte një luftë për çlirim, duke theksuar se ajo erdhi pas viteve të shtypjes dhe dhunës ndaj shqiptarëve në Kosovë.
“Lufta e Ushtrisë Çlirimtare të Kosovës ishte luftë e drejtë për çlirim. Ajo erdhi pas viteve të shtypjes dhe dhunës së një regjimi që përdori gjithë aparatin e vet shtetëror kundër shqiptarëve në Kosovë”, ka shkruar Haxhiu.
Sipas Haxhiut, marshi i sotëm dëshmoi se ky qëndrim mund të shprehet fuqishëm, duke ruajtur njëkohësisht qetësinë dhe dinjitetin
“Marshi i sotëm tregoi se ky qëndrim mund të shprehet fuqishëm duke ruajtur njëkohësisht qetësinë dhe dinjitetin. Kështu i bëhet nder sakrificës së atyre që luftuan dhe Republikës që u ndërtua mbi atë sakrificë”, ka shkruar mes tjerash Haxhiu.