Kuvendi i Kosovës ka mbajtur të premten një seancë solemne në nderim të ish-kongresmenit amerikan Eliot Engel, duke vlerësuar kontributin e tij të jashtëzakonshëm për çështjen e Kosovës, veçanërisht gjatë viteve më të vështira.
Kryetarja e Kuvendit, Albulena Haxhiu, theksoi se Engel ishte një mik i madh i Kosovës, i cili ngriti zërin në kohën kur populli i saj përballej me represion dhe shkelje të rënda të të drejtave nga regjimi serbo-jugosllav në vitet ’90.
Sipas saj, në një kohë kur bota hezitonte të vepronte, Engel bashkë me kongresistë dhe senatorë të tjerë amerikanë kontribuoi në ndërkombëtarizimin e çështjes së Kosovës, duke kërkuar liri dhe të drejta për popullin shqiptar.
“Në ditët më të vështira të historisë sonë të re, bashkë edhe me shumë kongresistë dhe senatorë të tjerë amerikanë, ngriti zërin fuqishëm kundër shkeljes së të drejtave tona, represionit dhe persekutimit nga regjimi serbo-jugosllav.
Ai kërkoi liri për popullin të Kosovës, duke shpërfaqur kështu virtytet e larta njerëzore të një politikani të rrallë dhe të një njeriu të madh. Në vitet e ’90-ta, kur shqiptarët e Kosovës po vuanin nën regjimin e Millosheviqit dhe bota ende hezitonte të vepronte, Eliot Engel ngriti zërin. Vendet e vogla shpesh duhet të trokasin gjatë në dyert e botës që të dëgjohen. Në shumë raste ato dyer mbeten të mbyllura derisa bëhet tepër vonë. Rajoni jonë njeh mirë këtë pritje. Por, kur ke miq sikurse kongresisti Eliot Engel, hapja e dyerve të tilla është e mundshme dhe është historike.
Disa javë më vonë, në Dhomën e Përfaqësuesve të SHBA-së u shqyrtua rezoluta 155 për Kosovën, tekst të cilin vetë Engel e kishte hartuar dhe e cila dënonte represionin në Kosovë, kërkonte rikthimin e të drejtave qytetare e politike të popullit tonë dhe rikthente Kosovën në vëmendjen e Washingtonit. Në raport me çështjen e Kosovës, Engel e kuptoi se kauzat e drejta kërkojnë unitet dhe bashkimin edhe të republikanëve, edhe të demokratëve. Prandaj suksesshëm arriti të sigurojë mbështetje të gjerë në Kongres.
Dy vite pas rezolutës, më 17 mars 1998, në Kongresin Amerikan, Engel foli për përshkallëzimin e dhunës në Kosovë dhe kërkoi që represioni nga regjimi gjenocidal i Serbisë ndaj shqiptarëve të Kosovës të mos tolerohej në asnjë mënyrë. Ai e futi Kosovën në rend dite në Washington. Në ato vite të rënda, Kosovës nuk i hynin në punë reagimet e vonshme. Por njerëzit që flisnin me kohë dhe aty ku fjala ka peshë. Engel ishte njëri prej atyre njerëzve”, tha Haxhiu.
