Deputeti nga Partia Demokratike të Kosovës (PDK), Bekim Haxhiu, ka thënë se Projektligji për Rregullimin e çmimit të barnave ishte propozuar një vit më herët nga partia e tij, por që nuk ishte përkrahur nga mazhoranca.
Për këtë çështje, Haxhiu thotë se një Projektligj i tillë është i mirëseardhur, pasi, sipas tij, keqpërdorimet me çmimet e barnave kanë qenë të shumta.
“Është një brengë sepse përveç çmimeve tjera, pra edhe çmimet e barnave janë rritur, është një fatkeqësi që edhe ka vazhduar blerja e barnave me çmime të shtrenjta, 200-300 për qind më shtrenjtë”, ka thënë Haxhiu për EO.
Ndonëse e kanë përkrahur në parim në Komisionin për Shëndetësi, Haxhiu e quan Projektligj të dobët dhe favorizim për oligarkët e mëdhenj.
“Ne e kemi miratuar në parim Projektligjin për Rregullimin e çmimit të barnave, projektligj të cilin ne e kishim propozuar një vit më parë, mirëpo që nuk ishte mbështetur në atë periudhë kohore, nga Lëvizja Vetëvendosje ka sjellë sot një projektligj i cili është shumë i dobët, shumë i vobektë, i cili do ta rrisë informalitetin, frikësohem shumë se do ta rrisë edhe do të ketë mungesë të barnave të caktuara në tregun tonë, sepse ky projektligj i favorizon një pjesë të bizneseve që ka manipuluar me këtë sektor, pra ata oligarkët e mëdhenj që kanë abuzuar me këtë sektor, ndërsa i godet bizneset serioze, edhe të cilat nuk kanë abuzuar me çmimin e barnave dhe tash mbetet të shihet dhe ne u thamë që do t’ua dorëzojmë projektligjin që kemi dorëzuar një vit më përpara, i cili projektligj edhe parasheh edhe rimbursim të barnave, që ky projektligj nuk e ka, pse nuk e kanë paraparë rimbursimin e barnave për nder nuk e di, por shteti është i detyruar që t’i sigurojë qytetarëve barna nga lista esenciale pa para edhe këtë duhet ta sigurojë shteti”, ka thënë deputeti nga radhët e PDK-së.
“Nëse iu keni pasur raste që furnizimi i barnave nga lista esenciale ka pasur mungesa, atëherë qytetarët janë detyruar t’i blejnë ato me çmime të larta, dhe kjo është arsyeja pse duhet të ketë pastaj rimbursim”, u shpreh ai.