Ministrja e Drejtësisë, Albulena Haxhiu, pas rastit për tentim dhunim ndaj një vazje në Pejë, ka deklaruar se institucionet e drejtësisë duhet të shqiptojnë dënime maksimale për dhunuesit e ngacmuesit seksual.
Sipas saj, ngacmuesit e dhunuesit po e vështirësojnë jetën e vajzave e grave gjithandej Kosovës dhe kjo është e patolerueshme.
“Për shkak të rritjes së rasteve të dhunës e ngacmimit seksual, para disa javëve kemi punuar në ndryshimin e Kodit Penal në drejtim të ashpërsimit të masave e dënimeve për dhunuesit dhe ngacmuesit”, ka shkruar Haxhiu në Facebook.
Po ashtu, ajo ka thënë se “të njëjtat do t’i finalizojmë dhe procedojmë tutje javën e ardhshme dhe do të përkujdesemi që të gjitha procedurat deri në fuqizim të bëhen në kohë sa më të shpejtë”.
Kujtojmë se ngjarja e tmerrshme ka ndodhur më 27 shtator derisa viktima femër në fjalë, ka qenë duek ecur në qendër të qytetit, ku është tentuar të dhunohet nga F.B, i cili të premten është arrestuar nga Policia e Kosovës.
Ndërkaq, rasti është bërë publik nga vet viktima në rrjetin social Facebook, duke bashkangjitur edhe videon e tentim dhunimit seksual.
E tmerrshme, një vajzë tentohet të dhunohet në qendër të Pejës