“Veç Kurti e di se cili prokuror, gjykatës, polic, mjek, anëtar bordi, kryeshef agjencie e drejtues tjerë institucionalë i pëlqen atij, kryekuvendarit dhe Presidentes”, kështu ka vlerësuar nënkryetari i Lidhjes Demokratike të Kosovës, Lutfi Haziri.
Më tej, Haziri e ka akuzuar kryeministrin e vendit Albin Kurti se ai nuk është duke dhënë përgjigje për një sërë çështjesh, siç është draftimi i Asociacionit për vetëmenaxhimin e komunave më shumicë serbe, ose kur do të zbatohet vendimi për hapjen e urës së Ibrit, që sipas Hazirit, ky vendim është marrë me urdhër të Kurtit.
“Kurti nuk tregon kur betohen kryetarët e rinj të komunave veriore, kur kthehen zyrtarët bojkotues të institucioneve në veri, kur zbaton draftimin e Asociacionit për vetëmenaxhimin e komunave më shumicë serbe e kur zbaton vendimin me kërkesen e tij për hapjen e urës per veriun e Mitrovicës”, ka shkruar në Facebook Haziri.
Më tej, ai ka thënë se kryeministri Kurti nuk ka asnjë datë se kur do të përfundojnë autostradat e nisura për Gjilan, Mitrovicë e Pejë.
“Kurti nuk tregon planin për kthimin e refugjatëve në atdheun e tyre për Mitrovicë dhe komunat në veri, nuk tregon kur ia kthen buxhetin vetanak komunave, nuk tregon kur përfundon autostrada për Gjilan, Mitrovicë e Pejë, si dhe 780 milionë euro të investimeve kapitale kur përfundojnë”.
“Kurti nuk tregon kur ta merr shpresën se i duhet me vazhdu shitjen e mjegullës politike për paaftësinë e ekipit dhe bedelëve të tij… Për të tjerët s’ka gajle. Populli thotë: Qeveria në qiell e populli në buqillë!”, ka përfunduar Haziri.