Shorti për gjysmëfinalet e Kupës së Kosovës është tërhequr gjatë ditës së martë të 21 marsit.

Klubi i Prishtinës do të përballet me FC Vushtrrinë, ekip që garon në Ligën e Parë.

Në këtë fazë të garës do të zhvillohen dy ndeshje (vajtje/ardhje).

Ndeshja e parë do të zhvillohet në Vushtrri më 5 prill, kurse ajo e kthimit në Prishtinë më 19 prill.

Ndryshe, ekipi “bardhekaltër” në çerekfinale e eliminoi Ballkanin duke e mposhtur me rezultat 2:0.

Paraprakisht e ka eliminuar në 1/8 e finales Dukagjinin e Klinës duke e mposhtur me rezultat 3:1.

Kryeqytetasit paraprakisht në fazën 1/16 kanë kaluar pa lojë pasi Vëllaznimi i Gjakovës ishte tërhequr nga gara.

Prishtina nga viti 1992 ka fituar 7 herë Kupën e Republikës, prej tyre 5 herë pas luftës.

Ky është edicioni i 4-të rresht që skuadra kualifikohet në gjysmëfinale. Prishtina trofeun e fundit e ka të fituar në edicionin 2019/20.

Ndërsa Llapi do të takohet me Gjilanin në gjysmëfinale.

Fituesi i Kupës së Kosovës do të luajë për kualifikime në garat evropiane.