Ambasadori i Shteteve të Bashkuara të Amerikës (ShBA) në Serbi, Christopher Hill, ka theksuar sërish se themelimi i Asociacionit të komunave me shumicë serbe në Kosovë, është obligim që del prej Marrëveshjes së Brukselit.
Në një intervistë për N1, Hill ka thënë se themelimi i Asociacionit është “nevojë urgjente”.
“Unë mendoj se ka një nevojë urgjente që të gjithë të bien dakord për këtë dhe të kuptojnë se pasi të angazhoheni për diçka, duhet ta përmbushni,” ka thënë Hill.
Ai nuk ka dashur t’i komentojë deklaratat që kanë qarkulluar në media, por ka theksuar se qëndrimi i emisarëve ndërkombëtarë është “komunikuar shumë mirë si në Serbi, ashtu edhe në Kosovë”.
Ndryshe, të mërkurën, ambasadori i ShBA-së në Kosovë, Jeffrey Hovenier, ka thënë se qëndrimi i ShBA-së është që ky Asociacion nuk duhet të jetë Republikë Serbe dhe as me kompetenca ekzekutive.
Po ashtu, edhe kryeministri i Kosovës, Albin Kurti, të mërkurën, ka theksuar sërish se një asociacion njëetnik nuk është i mundshëm në Kosovën me kushtetutë shumetnike.