Strukturat Hetimore të Drejtorisë Vendore të Policisë në Shkodër, bazuar në inteligjencën informative, se mbrëmjen e djeshme, një shtetase dyshohet se ka braktisur foshnjën e saj mashkull, të lindur më datë 30 dhjetor 2022, të cilën e ka hedhur në lumin Kir, kanë organizuar punën për verifikimin e këtij informacioni të marrë.
Si rezultat i kontrolleve të ushtruara nga shërbimet e Policisë, gjatë mbrëmjes së djeshme dhe orëve të para të mëngjesit të sotëm, në vendin e quajtur Postribë, në lumin Kir, u gjet i pajetë trupi i foshnjës së 32-vjeçares, e cila e kishte hedhur atë në lumë gjatë natës.
Policia e Shtetit bën të ditur se shërbimet e Policisë e kanë shoqëruar në ambientet e Drejtorisë Vendore të Policisë Shkodër, shtetasen O. G., 32 vjeçe, banuese në fshatin Myselim.
Ndërsa, është theksuar se në përfundim të veprimeve të para hetimore, të kryera në bashkëpunim me Prokurorinë pranë Gjykatës së Rrethit Gjyqësor Shkodër, u bë arrestimi në flagrancë i kësaj shtetaseje, për veprën penale “Vrasja me dashje”.
Ndër të tjera, thuhet se materialet procedurale i kaluan Prokurorisë pranë Gjykatës së Rrethit Gjyqësor në Shkodër, për veprime të mëtejshme.