Ish-kryeministri i Kosovës, Avdullah Hoti, e ka përkujtuar kolonelin Ahmet Krasniqi në përvjetorin e vdekjes heroike.
Nata e 21 shtatorit të vitit 1998, ishte një natë e ftohtë për Hotin, sepse sipas tij, ai e kishte marrë, “lajmin e kobshëm për vrasjen e atdhetarit, intelektualit, ministrit të Mbrojtjes dhe kolonelit Ahmet Krasniqi”.
“Kjo vrasje ishte sulm direkt ndaj institucioneve të Republikës së Kosovës që sapo kishin nisur të themelohen, ishte sulm mbi ushtarët e lirisë që komandonte koloneli”, ka theksuar Hoti.
Më tej, ai ka thënë se figura e kolonelit Krasniqi personifikohej me “atdhetarizmin, profesionalizmin dhe përgatitjen ushtarake”.
Për Hotin këto ishin arsyet pse njerëzit e urrenin dhe e vranë ministrin Ahmet Krasniqi.
Ai ka përfunduar duke thënë se vrasja e kolonelit kishte për qëllim vrasjen e pavarësisë së Kosovës.