Ish-kryeministri i Kosovës, Avdullah Hoti, ka kritikuar presidenten e Kosovës, Vjosa Osmani, duke theksuar se komandantja Supreme e Forcave të Armatosura nuk ka bërë asnjë koment në lidhje me përjashtimin e ushtrisë nga ushtrimi më i madh në rajon, i quajtur “Defender 2023”.
“Komandantja Supreme e Forcave të Armatosura asnjë fjalë s’e nxjerr nga goja për përjashtimin e ushtrisë të cilën e komandon, nga ushtrimi më i madh që është mbajtur ndonjëherë në rajon – ‘[Defender 2023’”, ka deklaruar ai.
Hoti ka akuzuar Osmani se, sipas tij, po ndihmon në shkatërrimin e marrëdhënieve me aleatin kryesor, ShBA-në, i cili ka garantuar sigurinë e shtetit të Kosovës.
“Shefja e shtetit po qëndron krah pushtetit në shkatërrimin e marrëdhënieve të Republikës së Kosovës me aleatin kryesor që garanton sigurinë e shtetit të Kosovës, SHBA-në”, ka shkruar ai në Facebook.
Ai gjithashtu ka shtuar se roli i presidentes është t’i mbajë balancat institucionale dhe t’i pengojë veprimet e mazhorancës që dëmtojnë interesat shtetërore duke u përqendruar në interesat e tyre elektorale.