Deputeti nga radhët e Lidhjes Demokratike të Kosovës, Avdullah Hoti, ka reaguar pas rritjes për 15.4 për qind të rrymës.
Duke përmendur rritjen e tatimit në pronë, Hoti, e ka kthyer në ironi dhe ka thënë se më e rëndësishmja është se ministrit të Financave, Hekuran Murati, po i tepron buxheti.
“Me rëndësi ministrit po i tepron buxheti. Është gëzuar se e ka mbyllur vitin 2022 me suficit. Ka harruar se suficiti është rezultat i bllokimit të investimeve kapitale”, ka shkruar Hoti në rrjetin social Facebook.
Me tri vota për Bordi i ZRRE-së, të enjten ka vendosur që çmimi i rrymës të shtrenjtohet për 15.4%, për të gjitha kategoritë pa përjashtim, ndërsa do të zbatohet nga data 1 prill deri më 31 mars 2024.
Nëpërmjet një njoftimi në Facebook, ZRrE-ja ka njoftuar se qëllimi i përcaktimit të tarifave është reflektimi te kostove të shërbimit për secilin aktivitet të sektorit të energjisë elektrike, ashtu që të garantohet siguria dhe vazhdueshmëria e furnizimit me energji elektrike.
Sipas ZRrE-së faktorët që kanë ndikuar në rritjen e kostove të furnizimit, janë:
- Rritja e çmimeve të energjisë elektrike në tregjet ndërkombëtare. Edhe pse në vitin 2023 çmimet e energjisë elektrike në tregjet evropiane shënuan rënie në krahasim me vitin 2022, ato vazhdojnë të jenë më të larta në krahasim me çmimet që mbulojnë tarifat aktuale.
- Kapacitetet e kufizuara gjeneruese në vend për të plotësuar kërkesën në rritje detyrojnë Kosovën të blejë sasi më të mëdha të energjisë elektrike në tregun rajonal dhe ndërkombëtar.
- Shkalla shumë e lartë e inflacionit, nga 0.25% deri në 1.75% në periudhën 2018 deri 2020, në 8.39% në vitin 2022, ndikoi në rritjen e konsiderueshme të kostove tek furnizuesit e energjisë elektrike.
Ndër të tjera, ZRrE-ja ka njoftuar të gjithë konsumatorët se çmimet e reja të energjisë do të aplikohen për sasinë e energjisë së konsumuar nga 1 prilli 2023.