Ish-kryeministri i Kosovës, Avdullah Hoti, e ka kritikuar Qeverinë për menaxhimin e buxheteve vjetore të tre viteve të fundit 2021, 2022 dhe 2023.
Hoti, nëpërmjet një postimi në Facebook, ka thënë se janë shpenzuar në total 8.63 miliardë euro në këto tri buxhete, por sipas tij, nuk është bërë e qartë se ku janë harxhuar këto mjete.
Po ashtu, Hoti ka thënë se nuk janë ndërtuar projekte të reja infrastrukturore, si autostrada, ura, tunel, çerdhe, shkolla, apo spitale të reja gjatë tre viteve të qeverisjes së fundit.
Ai gjithashtu ka theksuar se pagat nuk janë rritur dhe as policët nuk i kanë marrë shtesat e rrezikshmërisë që ishin premtuar në shkurt të vitit aktual.
“As shenjë nuk shihet se ku janë harxhuar gjithë këto mjete. Nuk ka ndonjë autostradë të re, urë të re, tunel të ri, çerdhe, shkolla apo spitale të reja. Pagat nuk janë rritur. As policët nuk i kanë marrë shtesat e rrezikshmërisë nga shkurti i këtij viti”, ka shkruar ai në Facebook.