Ish-kryeministri i Kosovës, Avdullah Hoti, njëherësh deputet i Lidhjes Demokratike të Kosovës (LDK), ka kritikuar Qeverinë e Kosovës për “menaxhim katastrofal të parasë publike”.
“As nuk i shpenzojnë mjetet për projekte kapitale dhe për rritje të pagave, e as nuk iu lënë qytetarëve që t’i shpenzojnë. I mbledhin pa nevojë, i mbajnë në llogari dhe zhvlerësohen nga inflacioni. Çfarë menaxhimi katastrofal i parasë publike”, ka shkruar Hoti në Facebook.
Hoti duke iu referuar statistikave të publikuara nga Agjencia e Statistikave, vlerëson se në tremujorin e tretë të vitit 2022, krahasuar me periudhën e njëjtë të vitit të kaluar, çmimet e prodhimit për biznese u rritën me 17.2 për qind mesatarisht.
Ai ka theksuar se rritjen më të madhe e ka pasur energjia elektrike dhe gazi me 49.7 për qind, duke i rritur kështu çmimet e produkteve të konsumit të përditshëm.
Sipas tij, sikur të ulej TVSH-ja dhe të hiqej akciza përkohësisht, sot nuk do të ishin 700 milionë euro në llogari të Qeverisë, të cilat sipas tij, po i zhvlerëson inflacioni.
“Sikur të ulej TVSH-ja dhe të hiqej akciza përkohësisht, siç kemi propozuar në pranverë, rreth 300 mil euro do të ishin në buxhetin e familjeve dhe bizneseve dhe do të qarkullonin në ekonomi, po ashtu çmimet prodhimit për biznese do të ishte më e ulëta. Rrjedhimisht, çmimet e produkteve të konsumit të përditshëm do të ishin më të ulëta dhe jeta e familjeve do të ishte më të lehtë”, ka vijuar ai.